કેન્દ્ર સરકારની પી.એમ. ઉજ્જવલા યોજના હેઠળ ફરીથી ગેસ કનેક્શન આપવાની પ્રક્રિયા શરૂ થઈ છે. ગરીબ બહેનો જ્યારે આ કનેક્શન મેળવવા માટે અરજી કરે છે ત્યારે નવા નિયમો મુજબ તેમનો વાર્ષિક આવક રૂ. 1,20,000 ની મર્યાદામાં હોવાનો આવક દાખલો કઢાવવો ફરજિયાત બનાવાયો છે. પરંતુ આવકનો દાખલો બનાવવા પહેલા એફિડેવિટ કરાવવું જરૂરી હોવાથી અરજદારોને પ્રથમ વકીલ, પીટીશન રાઈટર અથવા જાણકાર વ્યક્તિ પાસે જઈ એફિડેવિટ તૈયાર કરાવવું પડે છે.
એફિડેવિટ તૈયાર થયા બાદ મહિલાઓ મામલતદાર કચેરીએ અરજી માટે પહોંચે છે, પરંતુ ત્યાંથી તેમને આગળ એક વધુ મુશ્કેલીનો સામનો કરવો પડે છે. મામલતદાર કચેરી દ્વારા જણાવવામાં આવે છે કે રાશન કાર્ડમાં નોંધાયેલા દરેક સભ્યના બેંક ખાતાના સ્ટેટમેન્ટ લાવવાના રહેશે. એટલે કે રાશન કાર્ડમાં જેટલા નામ, એટલા સભ્યોના સ્ટેટમેન્ટ—અને આ પ્રક્રિયા મહિલાઓ માટે વધારાનો ભાર બની રહી છે.
બેંક સર્વર ડાઉનથી અરજદાર મહિલાઓને લાંબી રાહ
રાવલની દોઢસો જેટલી મહિલા અરજદારો હાલ ગંભીર મુશ્કેલીમાંથી પસાર થઈ રહી છે. એફિડેવિટ પૂર્ણ કરીને મામલતદાર કચેરીથી સૂચના મળ્યા બાદ તેઓ રાશન કાર્ડ (પરમિટ) મુજબના સભ્યોના બેંક સ્ટેટમેન્ટ લેવા બેંકોમાં પહોંચે છે, પરંતુ રાવલની મોટા ભાગની બેંકોમાં છેલ્લા અનેક દિવસથી સર્વર ડાઉન રહેતાં સ્ટેટમેન્ટ જ નીકળતા નથી. મહિલાઓ સવારે જાય તો બપોરે પાછી મોકલાય છે, સાંજ સુધી રાહ જોયા છતાં કામ થાય તેમ નથી—એવી સ્થિતિમાં તેઓ વારંવાર ધક્કા ખાઈ રહી છે.
સ્થાનિક રહેવાસીઓનું કહેવું છે કે રાવલ પંથકમાં જે પરિસ્થિતિ સર્જાઈ છે, એવી જ અવસ્થામાં રાજ્યના અન્ય વિસ્તારોમાં પણ અરજદારો ફસાયા હોવાની સંપૂર્ણ શક્યતા છે.
મહિલાઓએ કંટાળાનો સ્વર વ્યક્ત કરતાં જણાવ્યું કે—
“યોજનાનો લાભ તો પછી મળશે, પહેલા દસ્તાવેજો મેળવવામાં જ અડધું સપ્તાહ વેડફાઈ જાય છે. એક કચેરીથી બીજી કચેરી, પછી બેંક અને પાછું મામલતદાર—એવી દોડધામમાં ઘર-કામ પણ અસર પામે છે.”
નગરપાલિકા નિયમમાં સરળતા – માત્ર એક સભ્યનું સ્ટેટમેન્ટ જરૂરી
રાવલ નગરપાલિકા દ્વારા ઉજ્જવલા યોજનામાં અરજદારોની સહુવિધા માટે નિયમમાં સરળતા લાવવામાં આવી છે. હવે, રાશન કાર્ડના સર્વ સભ્યોના બદલે માત્ર એક સભ્યનું બેંક સ્ટેટમેન્ટ જ પૂરતું માનવામાં આવે છે. આ સુધારા દ્વારા મહિલાઓ પર પડતો ભાર ઘટાડવામાં આવ્યો છે અને કનેક્શન મેળવવાની પ્રક્રિયા ઝડપી અને સરળ બની છે. નગરપાલિકા સ્ટાફે જણાવ્યું કે આ પગલાંથી અરજદારોને લાંબા કચેરાની ચક્કરમાંથી રાહત મળશે.
યોજનની પ્રક્રિયા સરળ બનાવવા માંગ
રાવલ પંથકની બહેનોની માંગ છે કે યોજનાની પ્રક્રિયા સરળ બનાવવી જોઈએ, જેથી ગરીબ પરિવારોને અપાતો લાભ સહેલાઈથી મળી શકે અને મહિલાઓને દસ્તાવેજો માટે વારંવાર કચેરીના ચક્કર ન મારવા પડે.
